Dagur 2

Börnin vöknuðu kát og hress í morgun eftir góðan nætursvefn. Eftir fánahyllingu fengum við okkur morgunmat og var sumarbúðablandan vinsælust hjá hópnum.

Eftir morgunmatinn skunduðu allir á báta, ýmist á kanóa á tjörninni eða á árabáta á vatninu. Mikil gleði ríkti í hópnum og uppgötvaði margur ræðarahæfileika sína í dag.

Kristjana og Guðný í eldhúsinu buðu upp á gómsætt hakk og spaghetti í hádeginu, ásamt nýbökuðu brauði. Södd og sæl fórum við svo á fræðslustund þar sem Dúbbi dúfa heimsótti okkur og lærðum við meira um anda Guðs. Að því loknu útbjuggum við falleg bókamerki og allir drógu sér leynivin.

Á meðan stelpurnar í herbergjum 7 og 8 undirbjuggu kvöldvöku fóru nokkrir að veiða og má geta þess að einn fiskur veiddist en þar sem hann var heldur smár var honum sleppt í vatnið aftur. Kvöldvakan var svakalega skemmtileg, mikið sungið og enn meira hlegið.

Ávaxtahressingin var á sínum stað og helgistund í lokin.

Núna eru leiðtogarnir að lesa sögur inni á herbergjum og að því loknu fara allir að sofa, þreyttir og sælir eftir daginn.

Bendum ykkur á myndir sem eru komnar inn í myndaalbúm og við bætum við á morgun.

Athugasemdir

[Eygeður (mamma Benediktu) (IP-tala skráð) 21.6.2011 kl. 23:13]

Yndislegt að lesa bloggið frá ykkur og frábærar myndir, greinilega mikið gaman og mikil gleði hjá ykkur :)

[Fjóla (mamma Þorgerðar Siggu) (IP-tala skráð) 22.6.2011 kl. 00:26]

Frábært að geta lesið og séð hvað þið eruð að gera og alveg greinilegt að allir eru að skemmta sér vel. :-)

[María Huld, mamma Evu Rakelar (IP-tala skráð) 22.6.2011 kl. 12:08]

Það hefði verið gaman að vera fluga á vegg á kvöldvöku í gær. Góða skemmtun áfram :)

[Berghildur Fanney, mamma Mörtu:) (IP-tala skráð) 22.6.2011 kl. 21:38]

Greinilega mikið stuð:)  Skemmtið ykkur áframhaldandi:)