Veisludagur

Flestum gekk mun betur að sofna annað kvöldið sitt í sumarbúðunum en það fyrsta og sváfu vært og rótt. Í dag, á þriðja degi flokksins, hefur verið úrhellisrigning stóran hluta dagsins. Við létum það þó ekki stöðva okkur í að fara út heldur klæddum okkur bara þeim mun betur fyrir vikið. Eftir morgumatinn í morgun var því skundað niður á völl þar sem brennómóti flokksins lauk og einnig farið í fleiri leiki.

Í dag var messudagur og þar með sparifata- og veisludagur hjá okkur. Hádegismaturinn var því einkar veglegur eða bayonneskinka með kartöflum, grænmeti og sósu, mmm... og svo ís á eftir! Eftir mat var skipt í undirbúningshópa fyrir guðsþjónustuna þar sem sumir æfðu leikþátt, aðrir tónlistaratriði, enn aðrir undirbjuggu bænir og lestra og fjórði hópurinn skreytingar. Messan hófst svo kl. 14:30 og stóðu krakkarnir sig með mikilli prýði í henni og áttu skilið veglegt messukaffi ráðskonunnar, rjómatertu, skúffuköku og sírópslengjur!

Núna er hópurinn úti í "góða veðrinu" í spennandi ratleik þar sem verið er að leita að fjársjóð! Fram undan eru svo grillaðar pylsur í kvöldmatinn, nammi namm...

Athugasemdir

[Stefanía Anna Sigurjónsdóttir (IP-tala skráð) 7.7.2010 kl. 18:27]

Rosalega gaman að fylgjast með og greinilega mikið fjör  kveðja Stefanía og Þröstur ( foreldrar Sigursteins Má)

[Borghildur (IP-tala skráð) 7.7.2010 kl. 20:36]

Vá ekkert smá flott dagskrá og þvílíkar veislur held að  okkar komi meira en  heim. Kveðja Borghildur mamma Stefáns Alex.